ახალგორის №1 ქართული სკოლის დირექტორი, ნინო ამირანაშვილი, სასამართლოს გადაწყვეტილებით თანამდებობაზე აღადგინეს. ეს გადაწყვეტილება ცხინვალის საქალაქო სასამართლოს მოსამართლემ ფატიმა პარასტაევამ მიიღო. ამის შესახებ «Эхо Кавказа» -ს სამოქალაქო აქტივისტმა თამარა მეარაყიშვილმა აცნობა.
მეარაყიშვილის ინფორმაციით, სასამართლომ დაავალდებულა ადგილობრივი განათლების განყოფილება სკოლის დირექტორს განაცდური ხელფასის გარდა, 10. 000 რუბლი მორალური ზიანის ანაზღაურებაც გადაუხადოს.
დირექტორი თანამდებობიდან მიმდინარე წლის 3 თებერვალს გაათავისუფლეს, მას შემდეგ, რაც მან წეროვნის დევნილთა დასახლებიდან ახალგორში სასწავლად გადასული მოსწავლეების სკოლიდან გარიცხვაზე უარი თქვა.
ყველაფერი კი გასული წლის სექტემბერში დაიწყო. ახალგორის ქართულ სკოლაში წეროვნის დევნილთა დასახლებიდან 5 მოსწავლე გადავიდა. მათ ოკუპირებული დაბის სკოლაში გარკვეული საბუთები ჩაიტანეს, თუმცა 9 კლასის დამამთავრებელი ატესტატი საქმეში არ იდო. ამასობაში ახალგორის ე.წ. გამშვები პუნქტიც ჩაიკეტა, დაბის განათლების განყოფილებიდან კი ამირანაშვილს ბავშვების სკოლიდან გარიცხვა მოსთხოვეს, რაზეც დირექტორმა უარი განაცხადა.
სკოლის დირექტორს მოსწავლეები სკოლიდან რომ გაერიცხა, ჩაკეტილი გზის გამო ისინი ვეღარც წეროვანში დაბრუნებას მოახერხებდნენ და საერთოდ განათლების მიღების გარეშე დარჩებოდნენ, ამიტომ პირველი სკოლის დირექტორმა ბავშვის ინტერესი და უფლებები ყველაფერზე წინ დააყენა.
საკუთარი უფლებების დასაცავად ამირანაშვილმა ცხინვალის სასამართლოს მიმართა. მან თანამდებობიდან გათავისუფლება გაასაჩივრა და სამსახურში აღდგენა მოითხოვა.
ახალგორში ქართველი პედაგოგების შევიწროება და ქართულ ენაზე განათლების მიღების შეზღუდვა რამდენიმე წლის წინ დაიწყო და სკოლები ეტაპობრივად გადადიან რუსულენოვან სწავლებაზე. სულ უფრო მცირდება ქართული გაკვეთილები და სხვადასხვა საგნის გაკვეთილების ჩატარებაც რუსულ ენაზე დაიწყო.