ისლამური მმართველობის 30 წლის შემდეგ სუდანში სამართლებლივი ცვლილებები ამოქმედდა. ამის შესახებ Thomson Reuters-ი წერს.
გამოცემის ინფორმაციით, პირველ ეტაპზე რამდენიმე მკაცრი აკრძალვა მოიხსნა. კერძოდ, ქვეყანაში არამუსლიმებს ალკოჰოლის მოხმარების ნება დართეს, სასჯელის სახით გაროზგვა აიკრძალა, ქალთა წინდაცვეთის პრაქტიკა კი დანაშაულებრივი ქმედება გახდა. ქალებს ასევე აღარ დასჭირდებათ ნებართვა ოჯახის წევრებისგან შვილებთან ერთად გამგზავრებისთვის.
ასევე გაუქმდა სასიკვდილო განაჩენი მათთვის, ვინც ისლამს უარყოფს. მანამდე ასეთ ადამიანებს ქვებით ჩაქოლვით სჯიდნენ.
ცვლილებები ჯერ კიდევ აპრილში დამტკიცდა, თუმცა ძალაში დღეს შევიდა. სუდანის იუსტიციის მინისტრის თქმით, რეფორმის მთავარი მიზანი ქვეყანაში ადამიანის უფლებების დაცვაა.
„ყველა ამ ცვლილების მიზანი კანონის წინაშე თანასწორობის მიღწევაა. უარი ვთქვით ყველა მუხლზე, რომელიც დისკრიმინაციას იწვევს. ჩვენს ხალხს გარანტიას ვაძლევთ, რომ სამართლებლივი რეფორმა მანამ გაგრძელდება, სანამ არ გავაუქმებთ ყველა კანონს, რომელიც სუდანში ადამიანის უფლებებს არღვევს“, - აღნიშნა ნასრედინ აბდულბარიმ.
ქვეყანაში რეფორმები დიდი ხნის ლიდერის, ომარ ალ-ბაშირის გადადგომას მოჰყვა, რომელსაც ძალაუფლება შარშან, მასობრივი დემონსტრაციების შემდეგ ჩამოართვეს.