პირველად თავის ისტორიაში, გერმანიის ფედერალურმა მთავრობამ გენდერული თანასწორობის ეროვნული სტრატეგია დაამტკიცა.
სტრატეგიის დოკუმენტი მთავრობას ოჯახის, ქალთა და ახალგაზრდობის საქმეთა მინისტრმა, ფრანცისკა გიფაიმ წარუდგინა.
სტრატეგია მიზნად ისახავს ქალების უფრო მეტ ჩართულობას გადაწყვეტილების ყველა დონეზე, განსაკუთრებით კი ლიდერულ პოზიციებზე ბიზნესსა და პოლიტიკაში, გენდერული ნიშნით ანაზღაურების დისკრიმინაციის აღმოფხვრას, რომელიც ამ დროისთვის დაახლოებით 20% შეადგენს.
ახალი სტრატეგიის შესაბამისად, გერმანიის მთავრობა კანონების დამტკიცებისა და კომერციული კომპანიებისთვის სახელმწიფო დახმარების გაწევის პროცესში ერთ-ერთ მთავარ პრიორიტეტად გენდერული ბალანსის არსებობას გაითვალისწინებს.
სტრატეგიაში განსაკუთრებული ყურადღება სამუშაოსა და პირად ცხოვრებას შორის ბალანს ეთმობა და იმ ფაქტს, რომ ქალები უფრო მეტად მუშაობენ ნახევარ განაკვეთზე, ან საერთოდ არ მუშაობენ ოჯახური გარემოებების გამო.
2020 წლის ფებერვალში ფრანცისკა გიფაი გამოვიდა ინიციატივით, რომლის თანახმად ქვეყანაში მსხვილი კომპანიების დირექტორთა საბჭოების შემადგენლობაში ქალებისთვის მინიმუმ 30% კვოტა უნდა განისაზღვროს.
გასულ კვირას კი გერმანიის კანცლერმა ანგელა მერკელმა ამ ინიციატივას მხარდაჭერა გამოუცხადა.
გერმანიაში მიღებული კანონმდებლობით 2015 წლიდან საფონდო ბირჟაზე დარეგისტრირებული 108 კომპანიის სამეთვალყურეო საბჭოების შემადგენლობაში ქალებისათვის მინიმუმ 30% კვოტა განისაზღვრა. 2019 წლის მონაცემებით ქალები გერმანიის კომპანიების სამეთვალყურეო საბჭოების 34% -ს და დირექტორთა საბჭოების 10% -ს შეადგენდნენ.
გერმანიის უმსხვილესმა პარტიამ - ქრისტიან-დემოკრატიულ გაერთიანებამ (CDU) ასევე განაცხადა, რომ უახლოვეს დროში პარტიაში გენდერულ კვოტირებას შემოიღებს. პარტიის ლიდერმა ანეგრეტ კრამპ-კარენბაუერი პარტიის აღმასრუებელ კომიტეტებსა და გრემიუმებში ქალებისთვის 50% -იანი კვოტა მოითხოვა. პარტიაში გენდერული პარიტეტის მიღწევა სამი წლის განმავლობაში, ეტაპობრივად, 2025 წლამდე იგეგმება.
შეგახსენებთ, რომ გერმანიის მინისტრთა კაბინეტს ქალი-ანგელა მერკელი ხელმძღვანელობს, ხოლო მის შემადგენლობაში 15 მინისტრიდან- 6 ქალი და 8 კაცია.