68 წლის ასტრონავტი და ოკეანოგრაფი კეტრინ სალივანი ჩელენჯერის ღრმულში, ოკეანის ზედაპირიდან 10,9 კმ სიღრმეზე ჩავიდა.
შედეგად, სალივანი პირველი ადამიანი გახდა, რომელმაც ღია კოსმოსშიც იარა და ოკეანის ყველაზე ღრმა წერტილშიც ჩავიდა.
დოქტორმა სალივანმა და მისიის სპონსორი კომპანიის, EYOS Expeditions-ის მკვლევარმა ვიქტორ ვესკოვომ ღრმულში დაახლოებით საათ-ნახევარი გაატარეს. ჩელენჯერის ღრმული მარიანას ღარის სამხრეთ დაბოლოებაზე მდებარეობს.
ზღვის სიღრმეების საკვლევი სპეციალური ხომალდით დანიშნულების ადგილისკენ ისინი დაახლოებით ოთხი საათის განმავლობაში ჩადიოდნენ.
ზედაპირზე ამოსვლის შემდეგ, გემიდან მათ საერთაშორისო კოსმოსურ სადგურზე, დედამიწიდან 408 კმ სიმაღლეზე მყოფ ასტრონავტებს დაურეკეს.
36 years after my space walk, I became the first woman to dive to the deepest known spot in the ocean - the Challenger Deep. #WorldOceansDay pic.twitter.com/KWJxx4fBYR
— Kathy Sullivan (@AstroKDS) June 9, 2020
1978 წელს, კეტრინ სალივანი ნასას პირველ ასტრონავტ ქალთა რიგებს შეუერთდა. 1984 წლის 11 ოქტომბერს ის პირველი ამერიკელი ქალი გახდა, რომელიც ღია კოსმოსში გავიდა შატლ „ჩელნჯერიდან“, დედამიწის ზედაპირიდან 225 კმ სიმაღლეზე.
ნასაში 15-წლიანი კარიერის განმავლობაში, სალივანმა იფრინა კოსმოსური შატლის სამ მისიაში, მათ შორის მისიაში, რომელმაც კოსმოსში გაიტანა ჰაბლის კოსმოსური ტელესკოპი.
2014-2017 წლებში კეტრინ სალივანი აშშ-ის ოკეანისა და ატმოსფეროს ეროვნულ ადმინისტრაციას (NOAA) ხელმძღვანელობდა.