ქალებისა და ახალგაზრდების პოზიტიური როლი მშვიდობის მშენებლობის პროცესში, დევნილი და კონფლიქტით დაზარალებული პირების წინაშე არსებული გამოწვევები და ყოველწლიური საინფორმაციო ფორუმი -  ეს და სხვა საკითხები განიხილეს იძულებით გადაადგილებულ ქალთა ასოციაციის "თანხმობა" ორგანიზებით, გამართულ კონფერენციაზე. 
სამდღიანი კონფერენცია სხვადასხვა თემის დაფარვით, რამდენიმე პანელს მოიცავს.  მთავარი აქცენტია მშვიდობის მშენებლობის დღის წესრიგზე ქალთა პოზიტიური ზემოქმედების განსაზღვრა. 

"აქცენტი კეთდება, ასევე, ახალგაზრდების როლზე, რა გამოწვევები არსებობს და რა უნდა გავაკეთოთ, რომ რაღაცები შეიცვალოს. რა თქმა უნდა, საუბარი იყო #1325 სამოქმედო გეგმასა და მის ლოკალიზაციაზე. 

ქალების, ახალგაზრდა გოგოების პოზიტიურ როლს და მშვიდობის მშენებლობის თემას პირველი დღე დაეთმო. დღეს ვისაუბრეთ კონფლიქტის ტრანსფორმაციის და ამ კუთხით არსებული შესაძლებლობების შესახებ, ხვალ დევნილთა თემატიკას შევეხებით. 

მნიშვნელოვანია, რომ დავაფუძნეთ ყოველწლიური ფორუმი, რომელიც დევნილთა თემას ეხება და საკითხთან  დაკავშირებით, ყველა სახის ინფორმაცია განიხილება ამ გაზაფხულის ბოლოს . "- განაცხადა ასოციაციის "თანხმობა" წევრმა, მარინა ფოჩხუამ.  

ამასთან, დღევანდელი სესია ჯგუფებში მუშაობასაც მოიაზრებდა. მისი მიზანი იყო, არასამთავრობო ორგანიზაციების, გადაწყვეტილების მიმღები პირების, ახალგაზრდებისა და ქალების ჩართულობით,  მშვიდობის მშენებლობასთან დაკავშირებული გამოწვევების და საჭიროებების განსაზღვრა.  

კონფერენციას "ქალთა საინფორმაციო ცენტრის" დირექტორი, ელენე რუსეცკაია და კოალიციური პროექტის - “ქალები და ახალგაზრდები  ქალების, მშვიდობისა და უსაფრთხოების დღის წესრიგის  ადგილობრივ დონეზე განხორციელებისთვის”- მენეჯერი, ანა ნემსაძე ესწრებოდნენ.