რუსეთში მომზადდა კანონპროექტი, რომელიც ფემინიზმს ექსტრემისტულ იდეოლოგიად აღიარებს. კანონპროექტის ავტორი ოლეგ მატვეიჩევი, რუსეთის დუმის საინფორმაციო პოლიტიკის, ტექნოლოგიებისა და კომუნიკაციების კომიტეტის თავმჯდომარის მოადგილეა. კანონპროექტის შესახებ, დეპუტატმა რუსეთის პირველი არხის ეთერში ისაუბრა. 

„დასავლეთში ფემინისტები პუტინისა და რუსეთის წინააღმდეგ გამოდიან. ჩვენი ფემინისტები უბრალოდ დასავლეთის აგენტები არიან. ისინი ტრადიციული ღირებულებების ნგრევით არიან დაკავებულები, მათი საქმიანობა ეწინააღმდეგება პრეზიდენტის ბრძანებულებას, ტრადიციული ღირებულებების მხარდაჭერის შესახებ.

ფემინისტები განქორწინების, უშვილობის, აბორტის მომხრენი არიან. ისინი მოქმედებენ რუსეთის ფედერაციის დემოგრაფიული პოლიტიკის წინააღმდეგ“, - განაცხადა მატვეიჩევმა.

ასევე, მისი თქმით, სოციალურ ქსელებში შექმნილია ჯგუფები, რომლებიც რუსეთის შეიარაღებული ძალების შესახებ დეზინფორმაციას ავრცელებენ. მატვეიჩი აღნიშნავს, რომ კანონპროექტმა შესაბამისი კომისიის შეფასება უნდა გაიაროს და დადებითი დასკვნის შემთხვევაში, დუმაში დაინიცირდება. 

ინფორმაციისთვის, რუსეთში ერთ-ერთი ყველაზე დიდი ფემინისტური მოძრაობა- ფემინისტური ანტისაომარი წინააღმდეგობა- რომელიც რუს ფემინისტებს აერთიანებს, 2022 წლის თებერვალში უცხოური აგენტების სიაში შეიყვანეს. ამავე წელს, მოძრაობის აქტივისტებმა პეტერბურგის სამშობიარო სახლის წინ შემდეგი წარწერა გააკეთეს: „შენ ვაჟი ომისთვის არ გაგიჩენია“. 

ანტისაომარი განწყობის გამომხატველი მსგავსი აქცია მოსკოვსა და იჟევსკშიც ჩატარდა. აქტივისტები რუსეთის ქალაქებში ქალთა მარშებს ატარებენ, ასევე შექმნეს ომის საწინააღმდეგო აქციების მხარდაჭერის ფონდი.