მოვლენები
20 ახალგაზრდა მშვიდობის მშენებელი ქალი მთელი მსოფლიოდან, საქართველოში, ოთხდღიან სამუშაო შეხვედრაზე იმყოფებოდა. ქალთა წამყვანი ორგანიზაციების მხარდაჭერა კონფლიქტური და პოსტ- კონფლიქტური ქვეყნებიდან, მშვიდობის დამყარების მიზნით, მშვიდობის მშენებელი ახალგაზრდა ქალების ლიდერობის უნარების გაძლიერება და მათი შესაძლებლობების განვითარება - 4 500 აპლიკანტიდან შერჩეული მშვიდობის მშენებლები საპილოტე პროგრამაში გაერთიანდნენ.
ოთხდღიანი (20-23 მარტი) დატვირთული სამუშაო შეხვედრების ფარგლებში, განიხილეს ისეთი საკითხები, როგორებიცაა: მშვიდობის მშენებლობა და მშვიდობის შენარჩუნება; ქალები, მშვიდობა და უსაფრთხოება (WPS), ახალგაზრდები, მშვიდობა და უსაფრთხოება (YPS).
სხვადასხვა ქვეყნიდან, საქართველოში შეკრებილმა ახალგაზრდა ქალებმა გაიძლიერეს პროექტების მართვის უნარები, იმსჯელეს და ინფორმაცია მიიღეს ფონდების მოზიდვის, დონორებთან ურთიერთობის, ანგარიშგებისა და ეფექტური კომუნიკაციის საკითხებზე.
პროგრამის მიზანია, დინამიური და მონაწილეობითი ფორმატით, შეიქმნას უსაფრთხო სივრცე დისკუსიისთვის, გაზიარდეს სხვადასხვა ქვეყნის მშვიდობის მშენებელი ქალების და ორგანიზაციების გამოცდილება, გამოწვევები, გადაწყვეტის გზები და კარგი პრაქტიკები.
მომზადდება სემინარის შედეგების დოკუმენტი და მშვიდობისა და უსაფრთხოების გლობალური კოალიციის ფარგლებში, სხვა ახალგაზრდულ ორგანიზაციებში გაიგზავნება.
ოთხდღიანი სამუშაო შეხვედრის ერთ-ერთი პანელი იყო მშვიდობის დამყარებასა და შენარჩუნებაში მთავარი აქტორებისთვის, საქართველოს გამოცდილების გაზიარება. პანელზე ახალგაზრდა მშვიდობის მშენებლებს ჩვენს ქვეყანაში ამ მიმართულებით არსებული გამოწვევები და ორგანიზაციის კარგი პრაქტიკები გაუზიარა "ქალთა საინფორმაციო ცენტრის" ახალგაზრდა ლიდერმა, ანა ნემსაძემ.
პროგრამას გაეროს ქალთა ორგანიზაცია UN Women, გაერთიანებული ერების ორგანიზაციასთან (UNAOC), გაეროს ბავშვთა ფონდთან (UNICEF) და გაეროს მოსახლეობის ფონდთან (UNFPA) პარტნიორობით ახორციელებს.
