მიღწევები
წინასწარი შედეგების მიხედვით, მოლდოვის საპრეზიდენტო არჩევნების მეორე ტურში ოპოზიციის კანდიდატი, მაია სანდუ, ლიდერობს.
ხმების 99% უკვე დათვლილია, პროევროპელ მაია სანდუს 57.1% აქვს, რუსეთთან დაახლოებულ იგორ დოდონს კი - 42.9%.
ცნობისთვის, მაია სანდუ მსოფლიო ბანკის ყოფილი ეკონომისტია და ევროკავშირთან მჭიდრო კავშირს ემხრობა. ამასთან, სანდუ მოლდოვის განათლების მინისტრიც იყო. 2019 წელს ის პრემიერმინისტრის პოსტზეც დაინიშნა, თუმცა 5 თვეში პარლამენტმა სანდუს მთავრობას უნდობლობა გამოუცხადა.
სანდუს გადადგომას მხარს უჭერდნენ რუსეთთან დაახლოებული სოციალისტური პარტია და მოლდოვიდან გაქცეული ოლიგარქის, ვლადიმირ პლაჰოტნიუკის, დემოკრატიული პარტია.
შეგახსენებთ, რომ არჩევნების პირველ ტურში მაია სანდუმ ხმათა 35.77% აიღო, დოდონმა კი - 32.87%.
სანდუს მხარი მოლდოვის დიასპორის დიდმა ნაწილმაც დაუჭირა. ქვეყნის საზღვრებს გარეთ მცხოვრები 150 000 ამომრჩევლიდან დოდონს ხმა მხოლოდ 3.59%-მა მისცა.
