„სათავგადასავლო რალი საქართველო“ - ასეთი სახელწოდება აქვს ქალთა პირველ რალი რეიდს ჩვენს ქვეყანაში, რომელიც 11-დან 17 ოქტომბრამდე ჩატარდება.

წელს რალიმ სტარტი თბილისში აიღო და 16 ოქტომბერს ბათუმში დასრულდება. დაჯილდოების ცერემონია კი 17 ოქტომბერს გაიმართება.

ეკიპაჟის წევრები როგორც ქართველი, ასევე უცხოელი ავტომოყვარულები იქნებიან და ისინი საქართველოს გარშემო 6 დღის განმავლობაში დაახლოებით 1 800 კილომეტრს დაფარავენ.

მანქანაში იჯდება ერთი ქალი და ერთი კაცი, რომლებიც პილოტისა და ნავიგატორის ფუნქციების სურვილისამებრ გადაინაწილებენ.

ტურნირის მიზანია შექმნას უგზოო ავტორბოლაზე ახალი ხედვა და რბოლა სიჩქარისა და წამზომის გარეშე. მონაწილეებმა რუქების და სასურველი ნავიგაციის სისტემის გამოყენებით უნდა იპოვონ საკონტროლო პუნქტები, სადაც მაქსიმალურად მცირე დისტანციის დაფარვით მივლენ.

ღონისძიებას ასევე აქვს ჰუმანიტარული დანიშნულებაც - ეკიპაჟები თან წაიღებენ ჰუმანიტარულ დახმარებას და მოსახლეობას წიგნებს, სათამაშოებს, ტანსაცმელსა და ჰიგიენურ საშუალებებს დაურიგებენ. ტურნირში მონაწილეობას 15 ეკიპაჟი ღებულობს.