ნობელის პრემიის ლაურეატი ბელარუსი მწერალი სვეტლანა ალექსიევიჩი პრეზიდენტ ალექსანდრ ლუკაშენკოს მიმართავს და მოუწოდებს „ლამაზად წავიდეს“.
რადიო თავისუფლებისთვის მიცემულ ინტერვიუში მწერალი საუბრობს ქვეყანაში არსებულ პოლიტიკურ ვითარებაზე და აღნიშნავს, რომ საპრეზიდენტო არჩევნებში გამარჯვება სვეტლანა ციხანოვსკაიამ მოიპოვა.
„ჩემი აზრით, ხელისუფლებამ საკუთარ ხალხს ომი გამოუცხადა... მინდა ვთქვა ის, რაც მშვენივრად თქვა სვეტლანა კალინკინამ – წადი ლამაზად. თუმცა აღარ გამოვა, უკვე სისხლია. წადი, ვიდრე ძალიან გვიან არ არის, ვიდრე ხალხს საშინელ უფსკრულში არ ჩააგდებ, სამოქალაქო ომის უფსკრულში“, – განაცხადა ალექსიევიჩმა.
„მე ვეთანხმები იმ აზრს, რომ ციხანოვსკაიამ თავისი საქმე გააკეთა. ის იყო და რჩება ცვლილებების, ახალი ცხოვრების, პატიოსნების, ხალხისთვის და საკუთარი ქმრისთვის თავგანწირვის სიმბოლოდ. ბოლოს და ბოლოს, ადამიანი არ არის ყოვლისშემძლე. მან გააკეთა ის, რაც შეეძლო“- განაცხადა ალექსიევიჩმა.
„არავის სურს მაიდანი, არავის სურს სისხლი. მაგრამ ეს აღარ გამოვა, უკვე სისხლი დაიღვარა. წადი, ვიდრე ძალიან გვიან არ არის, სანამ ხალხი სამოქალაქო ომის უფსკრულში არ ჩაათრიე! წადი! მაიდანი არავის სურს, სისხლი არავის სურს. მხოლოდ შენ გსურს ხელისუფლება. მხოლოდ შენი სურვილი მოითხოვს სისხლს“, – მიმართავს მწერალი ლუკაშენკოს.
ბელარუსში საპრეზიდენტო არჩევნები 9 აგვისტოს ჩატარდა. ცესკოს მონაცემებით, მოქმედმა პრეზიდენტმა ალექსანდრ ლუკაშენკომ ხმათა 80.08% მოიპოვა.