მოვლენები
ბელარუსში პრეზიდენტობის კანდიდატის, სვეტლანა ტიხანოვსკაიას მხარდამჭერი ფართომასშტაბიანი აქცია გაიმართა. ინფორმაციას ამის შესახებ BBC-ი ავრცელებს.
უფლებადამცველების თქმით, აქციაზე 63 000-ზე მეტი მოქალაქე იმყოფებოდა.
აქციაზე სიტყვით გამოვიდა თავად სვეტლანა ტიხანოვსკაიაც და ბელარუსის მოქმედ მთავრობას მოუწოდა, რომ საპრეზიდენტო არჩევნები და ქვეყანაში რუსული კერძო სამხედროების დაკავების ფაქტი ერთმანეთს არ დაუკავშირონ.
„რომელი რევოლუცია, ჩვენ სამართლიანი არჩევნები გვინდა, რატომ უწყობთ პროვოკაციებს საკუთარ ერს? ჩვენ მშვიდობიანი ხალხი ვართ და ჩვენს ქვეყანაში მშვიდობიანი ცვლილებები გვინდა“, – განაცხადა აქციაზე ტიხანოვსკაიამ.
ადგილობრივი მედიის ინფორმაციით, ბელარუსში რუსეთის მოქალაქეების დაკავების შემდეგ, უსაფრთხოების ზომები გამკაცრებულია და მეგობრობის პარკი, სადაც საპროტესტო აქცია გაიმართა, რკინის ბარიერებით იყო შემოღობილი.
ბელარუსში მოახლოებული საპრეზიდენტო არჩევნების ყველაზე დიდი სიურპრიზი სვეტლანა ტიხანოვსკაია გახდა. ბოლო დრომდე ყველასათვის უცნობი ახალგაზრდა ქალი ქუჩაში ათასობით მხარდამჭერს აგროვებს და “ევროპის უკანასკნელ დიქტატორს” უპირისპირდება.
ტიხანოვსკაია პრეზიდენტობის კანდიდატი მას შემდეგ გახდა, რაც დააპატიმრეს მისი მეუღლე, ბიზნესმენი და პოპულარული ბლოგერი სერგეი ტიხანოვსკი, რომელიც საპრეზიდენტო არჩევნებში მონაწილეობას აპირებდა.
სვეტლანა ტიხანოვსკაიას პროგრამა მარტივია – 6 თვის განმავლობაში ბელარუსში ახალი, თავისუფალი არჩევნების ჩატარება.
ტიხანოვსკაიას საარჩევნო შტაბში გაერთიანდა კიდევ ორი კანდიდატის – ვიქტორ ბაბარიკოს და ვალერი ცეპკალოს შტაბები, რომლებიც ხელისუფლებამ არ დაარეგისტრირა. პირველი მათგანი, შვილთან ერთად, დაკავებულია, მეორე კი იძულებული გახდა ქვეყანა დაეტოვებინა.
