ვენეციის საერთაშორისო კინოფესტივალის ორგანიზატორებმა ჟიურის წევრების სრული სია გამოაქვეყნეს.

მთავარი კონკურის ჟიურის თავმჯდომარე, ავსტრალიელი მსახიობი, ქეით ბლანშეტი იქნება. მასთან ერთად საუკეთესო ნამუშევრებს ფრანგი მსახიობი, ლუდივინ სენიე; რეჟისორები: ჯოანა ჰოგი, კრისტი პუიუ, კრისტიან პეტცოლდი, ვერონიკა ფრანცი და იტალიელი მწერალი, ნიკოლა ლაჯოია შეაფასებენ.

მნიშვნელობით მეორე კონკურსის, ჰორიზონტების, ჟიურის თავმჯდომარე ფრანგი რეჟისორი, კლერ დენია. გამარჯვებულების გამოვლენაში მას პროდიუსერი, კრისტინ ვაჩონი, რეჟისორები: ოსკარ ალეგრია, ფრანჩესკა კომენჩინი და ისრაელის კინოფონდის დირექტორი, კატრიელ შორი დაეხმარებიან.

ვირტუალური რეალობისთვის შექმნილ ნამუშევრებს ლეგენდარული იაპონელი თამაშების შემქმნელი ჰიდეო კოჯიმა შეაფასებს.

ბრიტანელი მსახიობი ტილდა სუინტონი და ჰონგ-კონგელი რეჟისორი ენ ჰუეი, ვენეციის 77-ე კინოფესტივალის ფარგლებში, კარიერული მიღწევებისათვის დაჯილდოვდებიან.

ოქროს ლომის კარიერული წინსვლისთვის გადაცემის გადაწყვეტილება საერთაშორისო კინოფესტივალის ადმინისტრაციამ, დირექტორის ალბერტო ბარბერის წინადადების შემდეგ მიიღო.

კინოფესტივალი მიმდინარე წლის 2 სექტემბერს დაიწყება. კონკურსში მონაწილე ფილმების სრული სია 28 ივნისს გახდება ცნობილი.