თერჯოლაში, იმერეთის სამხარეო სამედიცინო ცენტრის ,,იმერმედი“-ს ბაზაზე ვასილ ვერულაშვილის სახელობის მეორე დონის სამშობიარო სახლი გაიხსნა.
სამშობიარო სახლი დაკომპლექტებულია უმაღლესი კატეგორიის ექიმებით (მეან-გინეკოლოგებით, ანესთეზიოლოგებით, რადიოლოგებით და ა.შ.)
მოქალაქეებს საყოველთაო ჯანდაცვის პროგრამის ფარგლებში შესაძლებლობა ექნებათ მიიღონ სრული სამეანო-გინეკოლოგიური მომსახურეობა. სამშობიარო სახლის ნეონატოლოგიური სამსახური უზრუნველყოფს 34 კვირის ზევით ახალშობილთა სრულ ნეონატოლოგიურ ინტენსიურ მომსახურეობას.
სამშობიარო სახლის გახსნას კლინიკის თანამშრომლები, ქ. თერჯოლის მუნიციპალიტეტის ადგილობრივი ხელისუფლების წარმომადგენლები დაესწრნენ. საზეიმო ლენტი გაჭრა ვასილ ვერულაშვილის ქალიშვილმა, პროფესორმა, გინეკოლოგმა და ორგანიზაცია „ქალთა ცენტრის“ ხელმძღვანელმა ია ვერულაშვილმა.
„დღეს ჩემთვის და ჩვენი ოჯახისთვის ძალიან მნიშვნელოვანი დღეა გაიხსნა თერჯოლაში, მამაჩემის, პროფესორ ვასო ვერულაშვილის სახელობის სამშობიარო სახლი. ის არა მარტო დიდი პროფესიონალი, არამედ ძალიან თბილი, მზრუნველი პიროვნება იყო, რომელიც თესავდა მარტო სიკეთეს. მისი ბოლო სამუშაო ადგილი იყო ევრომედცენტრი. ამიტომ მივიღე გადაწყვეტილება და მთლიანათ მთელი ევრომედცენტრის აღჭურვილობა გადავეცი თერჯოლის სამედიცინო ცენტრს, რომ მოხმარდეს იმ რეგიონს, სადაც ის დაიბადა და გაიზარდა“- დაწერა თავის facebook გვერდზე ია ვერულაშვილმა.