გენდერული ძალადობა
პარლამენტმა „სისხლის სამართლის კოდექსში“ შესატანი ცვლილებების პროექტი და მისგან გამომდინარე საკანონმდებლო ცვლილებათა პაკეტი პირველი მოსმენით დაამტკიცა. პაკეტის თანახმად, 14 წელს მიუღწეველი პირის მიმართ სექსუალური ხასიათის სხვაგვარი ქმედების ჩადენისთვის გათვალისწინებული სასჯელი მკაცრდება და ამგვარი დანაშაულის ჩადენა 14 წელს მიუღწეველ პირთან, დაისჯება 15-დან 20 წლამდე პატიმრობით.
ასევე, მკაცრდება 16 წელს მიუღწეველ პირთან სქესობრივი კავშირზე სასჯელი შემდეგ შემთხვევებში: შშმ პირის ან ორსულის მიმართ; ჯგუფურად; ორი ან მეტი პირის მიმართ; არაერთგზის; სქესობრივი თავისუფლების წინააღმდეგ მიმართულ დანაშაულებში ბრალდებული პირის მიერ და ასეთ შემთხვევაში გათვალისწინებული იქნება 8-დან 12 წლამდე პატიმრობა.
ამასთან, გათვალისწინებულია სასჯელის გამკაცრება გარყვნილი ქმედებისთვისაც და ძალადობის გარეშე სრულწლოვნის გარყვნილი ქმედება თექვსმეტი წლის ასაკს მიუღწეველთან დაისჯება 5-დან 9 წლამდე თავისუფლების აღკვეთით, ხოლო იგივე ქმედება ჩადენილი: ა) შშმ პირის ან ორსულის მიმართ; ბ) ჯგუფურად; გ) ორი ან მეტი პირის მიმართ; დ) არაერთგზის, ე) სქესობრივი თავისუფლების წინააღმდეგ მიმართულ დანაშაულებში ბრალდებული პირის მიერ, გამოიწვევს 8-დან 12 წლამდე თავისუფლების აღკვეთას.
კანონპროექტის ინიციატორი დეპუტატთა ჯგუფია: სოფო კილაძე, ირაკლი კობახიძე, შალვა კიკნაველიძე, მერაბ ქვარაია, რატი იონათამიშვილი, ილია ნაკაშიძე, დიმიტრი მხეიძე, დავით მათიკაშვილი, ანრი ოხანაშვილი, პაატა მხეიძე, გია ბენაშვილი, ცოტნე ზურაბიანი, გოგი მეშველიანი, ენძელა მაჭავარიანი, სვეტლანა კუდბა, ფატი ხალვაში.
