პაკისტანში ორი თინეიჯერი გოგო მას შემდეგ მოკლეს, რაც ინტერნეტში ბიჭთან ერთად გადაღებული ვიდეო გავრცელდა. გავრცელებული ინფორმაციით, გოგოები ოჯახის წევრებმა ჩაცხრილეს.

პოლიციის განცხადებით, მკვლელობა მას შემდეგ მოხდა, რაც სოციალურ ქსელში გავრცელა ვიდეო, რომელშიც სამი გოგო ბიჭთან ერთად ჩანს. ვიდეო იზოლირებულ სივრცეშია გადაღებული.

საქმეზე უკვე დაკავებულია ორი პირი. როგორც გამოცემას უთხრეს, დაკავებულებიდან ერთი გოგოს მამა და მეორე მოკლულის ძმა არიან.

ასევე დააპატიმრეს ადამიანი, რომელმაც ვიდეო გადაიღო, ხოლო მკვლელობაში  ეჭვმიტანილი გოგოების ერთ-ერთი ნათესავი, ჯერ კიდევ თავისუფალია.

პოლიციაში განმარტავენ, რომ 16 და 18 წლის გოგოების მკვლელობა 14 მაისს ჩრდილოეთ ვაზირისტანის ერთ-ერთი სასაზღვრო სოფელში მოხდა. წინასწარი ინფორმაციით, ვიდეო ერთი წლის წინაა გადაღებული, თუმცა სოციალურ ქსელებში ერთი კვირის წინ გავრცელდა.

"სანამ რაიმე ღონისძიებებს მივიღებთ, ამ ეტაპისთვის ჩვენი მთავარი პრიორიტეტია მესამე გოგოსთვის და ბიჭისთვის უსაფრთხოების დაცვა", — განაცხადა პოლიციის ოფიცერმა.

უფლებადამცველი ორგანიზაცია Human Rights Watch აცხადებს, რომ ქალებსა და გოგოებზე ძალადობა პაკისტანში სერიოზული პრობლემაა. აქტივისტების თქმით, ე.წ. ღირსების აღდგენის მოტივით ყოველწლიურად ათასი მკვლელობა ხდება.