კორონავირუსით გამოწვეული იზოლაციის გამო, ოჯახში ძალადობის შემთხვევებმა გლობალურად იმატა. მსოფლიოს მასშტაბით ყოველი 3 ქალიდან 1 ოჯახში ძალადობის მსხვერპლია.
Covid-19-ის გავრცელების თავიდან არიდების მიზნით, სახლში დარჩენა ბევრისთვის მოძალადესთან ერთად ყოფნას ნიშნავს.
ამასთან დაკავშირებით, კომპანია The Body Shop - მა და საერთაშორისო ორგანიზაცია NO MORE-მა წამოიწყეს გლობალური კამპანია „Isolated Not Alone“ (იზოლაციაში არ ხარ მარტო).
გლობალური კამპანიის მიზანს წარმოადგენს თვითიზოლაციის პერიოდში ქალთა მიმართ და ოჯახში ძალადობის წინააღმდეგ საზოგადოების ცნობიერების ამაღლება და მგრძნობელობის გაზრდა.
საქართველოში კამპანიას The Body Shop Georgia და UNFPA საქართველოს ოფისი შეუერთდა. ასევე გაეროს მოსახლეობის ფონდის UNFPA საქართველოს ოფისსა და "ბოდი შოპს" შორის თანამშრომლობის ხელშეკრულება გაფორმდა. მემორანდუმის ფარგლებში UNFPA საქართველოს ოფისი და "ბოდი შოპი" მჭიდროდ ითანამშრომლებენ გენდერული თანასწორობის მხარდაჭერის, სქესობრივი და რეპოდუქციული ჯანმრთელობისა და უფლებების დაცვის, მოზარდი გოგონებისა და ახალგაზრდა ქალების გაძლიერების მიმართულებით.
კამპანიის ფარგლებში, საქართველოში ბოდიშოპის მიერ გაყიდული ყველა პროდუქციიდან 2% გადაირიცხება „ძალადობისგან დაცვის ეროვნული ქსელის“ თავშესაფარში, ოჯახში ძალადობის მსხვერპლი ქალების და ბავშვების დასახმარებლად.
„მთელი მსოფლიო ძალიან რთულ პერიოდს გადის. სამწუხაროდ, ამის შედეგი არის ოჯახში ძალადობის შემთხვევათა დრამატული ზრდა. ბოდი შოპს გააჩნია გლობალური შესაძლებლობები და ზეგავლენა, რომელიც გვინდა გამოვიყენოთ ქალების დასაცავად. როგორც კომპანია Natura &Co ოჯახის ნაწილი, ჩვენ შეგვიძლია ხმა მივაწვდინოთ 200 მილიონ მომხმარებელს 70 ზე მეტ ქვეყანაში, რათა ხელი შევუწყოთ პრობლემის გადაწყვეტას “- განაცხადა ბოდი შოპის გენერალურმა დირექტორმა დევიდ ბოიტონმა.