ჯანდაცვის სისტემებზე მძიმე დატვირთვის გამო, დედათა და ბავშვთა სიკვდილიანობის მაჩვენებლები შესაძლოა მკვეთრად გაიზარდოს. ამ განცხადებას, გაეროს ბავშვთა ფონდი (UNICEF), ჯონს ჰოპკინსის უნივერსიტეტში ჩატარებული კვლევის საფუძველზე აკეთებს.
ექსპერტებმა წარმოადგინეს პანდემიის დროს განვითარებული სამი შესაძლო სცენარი. ერთ-ერთი სცენარის მიხედვით, 118 დაბალი და საშუალო შემოსავლის მქონე ქვეყნებში, მხოლოდ ექვსი თვის მანძილზე 5 წლამდე ბავშვთა სიკვდილიანობის მაჩვენებელი 1.2 მილიონით მეტი იქნება, ვიდრე კრიზისის დაწყებამდე.
ექსპერტები ამის მიზეზად საჭირო ვაქცინაციის არ ჩატარებას, დროული სამედიცინო დახმარების არარსებობას და შიმშილს ასახელებენ. ჩვეულებრივ, ამ 118 ქვეყანაში საშუალოდ ნახევარ წელიწადში 5 წლამდე ბავშვთა სიკვდილიანობა 2,5 მილიონს შეადგენს. წელს, ამ მაჩვენებელმა შესაძლოა 3,7 მილიონს მიაღწიოს.
პროგნოზის თანახმად, მიმდინარე წელს ექვსი თვის განმავლობაში, დედათა სიკვდილიანობის მაჩვენებელი 56,700-ით მეტი იქნება, ვიდრე წინა წლებში.
გაეროს ბავშვთა ფონდის განცხადებით, თუ მოსახლეობა არ იქნება სათანადოდ უზრუნველყოფილი ჯანდაცვის სერვისებით და საკვებით, ბავშვთა და დედათა სიკვდილიანობის ზრდა კატასტროფული იქნება.
შეგახსენებთ, რომ 37 ქვეყანაში 117 მილიონზე მეტმა ბავშვმა შეიძლება წითელას ვაქცინა გამოტოვოს, რადგან პანდემიის გამო იმუნიზაციის კამპანიები შეჩერებულია.