2020 წლის 3 აპრილს, COVID-19- ის პანდემიის გავრცელების წინააღმდეგ ბრძოლის მიზნით, ონლაინ რეჟიმში, აღმოსავლეთ პარტნიორობის ქვეყნების წარმომადგენლების სუბრეგიონალური კონსულტაციები გაიმართა. 

კონსულტაციებში მონაწილეობა 80-დე არასამთავრობო და ქალთა ორგანიზაციების წარმომადგენელმა, ახალგაზრდა და სამოქალაქო აქტივისტმა მიიღო. საქართველოდან, შეხვედრას ესწრებოდნენ ქალთა ორგანიზაციების ხელმძღვანელები: ქალთა ინფორმაციის ცენტრი, ელენა რუსეცკაია; საფარი, ბაია პატარია და თანხმობა, იულია ხარაშვილი.

კონსულტაციების მიზანს წარმოადგენდა შექმნილი ვითარებისა და გენდერული პერსპექტივის გათვალისწინებით პრობლემებზე რეაგირების გზების მონახვა და პრიორიტეტების განსაზღვრა. განსაკუთრებით ეს ეხებოდა პრობლემებს, რომელიც ყველაზე მოწყვლად ჯგუფებს (თვითდასაქმებული მუშაკები, შეზღუდული შესაძლებლობის მქონე პირები, არალეგალური მიგრანტები, ლტოლვილები და ა.შ.) შეექმნათ.

შეხვედრის მონაწილეებმა განიხილეს სხვადასხვა ქვეყნებში არსებული ვითარება და განიხილეს პრობლემები, რომელიც პანდემიის პირობებში განსაკუთრებით ქალებსა და გოგონებს შეეხო:

• გენდერული ნიშნით ძალადობის შემთხვევების ზრდა;
• თვითდასაქმებული ქალების, ქალი მეწარმეების, სახლში მომსახურე პერსონალის შემოსავლის დაკარგვა და ა.შ.

მსგავსი კონსულტაციები გაგრძელდება მომავალშიც, რაც შესაძლებლობას მისცემს მის მონაწილეებს გაცვალონ გამოცდილება, ცოდნა და იდეები, COVID-19- ის პანდემიის გავრცელების წინააღმდეგ ბრძოლის მიმართულებით.